Mga Kwentong Ewan ni Intoy Boknoy

Bagong Salta

Pumasyal si Boknoy sa kanyang probinsiya upang kamustahin ang kanyang kababata na matagal niya nang hindi nakikita. Medyo malaki na rin ang pinagbago ng lugar dahil nadidiligan na ito ng mangilangilang kalsada at kabahayan. Dinalaw niya ang pinakamatalik niyang kaibigan si Nonoy Alimango.

Tok-tok-tok...

"Tao po!"

Tok-tok-tok

"Tao po!," ang hudyat ng pagbisita ni Boknoy sa kanyang kaibigan

"Yawa, ikaw pala Boknoy, ka gwapo man natin uy ah," usisa agad ng kaibigan.

"Hindi naman," cute lang.

"Ba't naman diri ka nag-pasabi na mamalakat ka dini," suwestyon nito.

"Pacensya na kasi na miss talaga kita eh,"

Nag-power hug silang dalawa dahil sa tagal na di pagkikita.

"Musta man sa Manila? Kaganda uy nang imong balat ah,"

"Hindi naman nalayo lang tayo sa dagat kaya medyo kuminis" pagpapakumbaba ni Boknoy.

Nagpumilit si Nonoy Alimango na sumama ito kay Boknoy papuntang Manila, para naman daw bago siya pumanaw ay masilayan niya ang hiwaga ng Manila na kanyang naririnig sa kanyang transistor radio.

Kababa lang nila ng barko at sumakay sila ng Bus upang tumuloy sa bahay ni Boknoy.

Habang nasabyahe ay panay ang linga ng kaibigan.

"Boknoy, ganda man ng Manila ang tataas ng sampayan, pa'no man sila nakakapagsampay, ka lula man at sobra man ang haba," tinuturo nito ang mga poste ang mahabang linya ng kuryente.

"Wala man ganito sa probinsya, tsk..tsk..ka swerte mo man at dito ka na nakatira at hindi mahirap magsampay," dagdag nito.

kinabukasan ay namasyal sila sa Mall at nanood ng sine.

"Hala Intoy hindi ka man nahiya, hindi mo hinubad ang tsinelas mo bagong linis ang sahig at makintab pa,"

Hawak nito sa magkabilang kamay ang tsinelas habang naglalakad.

"Grabe naman ang lamig dito para kang nasa gitna ng laot, kalaki pa ng T.V. sa unahan, pa'no kaya nila ginawa yan ha?" tanong ng kaibigan.

"Sine ang tawag d'yan kasi pinalaking T.V. lang.

Ang palabas ni Fernando Poe ang kanilang napiling panoorin.Nakipagbarilan si FPJ sa kanyang mga kalaban. Bratattttttttt......,umaalingawngaw ang bawat putok ng baril sa loob ng sinehan.

"Hala! Intoy dumapa ka, dali!"

"Sumigaw ito sa mga katabi, oi, magsidapa man kayo...tatamaan tayo ng bala!!"

Nagtakbuhan papalabas ang mga tao sa loob ng sinehan.

Sunod-sunod ang putok na pinakawalan ni FPJ.

Sumuot sa ilalim ng upuan ang kanyang kaibigan at nanginginig sa takot.

"Lumabas ka diyan," tawag ni Intoy.

"Hindi! kung alam ko lang naman na papatayin mo ako dito, e, di na sana ako sumama sa'yo"

"Totoo pala ang mga balita na naririnig ko, magulo sa Maynila"

"Bukas na bukas din ay uuwi na ako ng probinsiya, mamatay ako dito ng maaga"